Алампаҕа сүгүрүйүү
14.11.2022
Удьуор аймах, Улуу доҕор, Төрүөбүт дойду, Төрүт сир Төһөҕө даҕаны Төлкө үөскүүрүгэр Төрүт буолар… Аҕа аймах, Айылгы чаҕар Арахсар күҥҥэ Ахтылҕаннаах буолар… Кэскил кэлэрэ Кэлбит сиртэн, Уруй олохсуйара Олохтоох дойдуттан. Аар тарҕанара Аҕа ууһуттан. Алампа. 1924с. Дьокуускай Саха литературатын төрүттээбит классик суруйааччылартан биирдэстэрэ, уус-уран литература үс көрүҥэр уһулуччулаах айымньылары хаалларбыт улуу талаан, Саха театрын аҕалаатар аҕата, төрөөбүт тылынан бастакы хаһыаттары, сурунааллары тэрийсибит бэчээт пионера, сцена искусствотын теоретига, сахаҕы тылбаас оскуолатын, литературнай кириитикэни төрүттэспит, норуот олоҕор сүҥкэн суолталаммыт бастакы культурнай-сырдатар, научнай-чинчийэр уопсастыбалары тэрийсибит салайааччы, биллэр-көстөр общественнай-политическай деятель, бөлүһүөк Анемподист Иванович Софронов-Алампа төрөөбүт күнүнэн үгэс быһыытынан көмүс уҥуоҕар сүгүрүйүү ыытылынна. Сүгүрүйүүгэ Алампа аймахтара Попов Н.В., Ф.М.Харитонова,И.М.Билюкина, М.П.Татаринова иһирэх тылларынан ахтан-санаан аастылар. Бүгүн Алампа «Ыллыым ээ, ыллыым» хоһооно 32 омук тылынан саҥарбыт биир хоһоонун антологията сүрэхтэнэр күнүгэр Авкс. Мординов аатынан Таатта лицейын 9 кылааһын үөрэнээччилэрэ Эрчим Габышев, Афоня Ширяев сахалыы-нууччалыы тылбааһын ааҕан иһитиннэрдилэр.