Совместные проекты

“Сыгынахтаах аартык-2021”

Балаҕан ыйын 14-16 күннэригэр, сарсыарда 10 чаастан, «Таатта» литературнай-художественнай түмэл тиэргэнигэр саха норуодунай суруйааччыта Д.К.Сивцев-Суорун Омоллоон төрөөбүтэ 115 сылыгар аналлаах “Эрэл” сокуоннай саастарын ситэ илик оҕолору чөлүгэр түһэрэр социальнай киин» бырайыагынан аан бастыкытын улуустааҕы «Сыгынахтаах аартык» мас оҥоһуктар күрэхтэрэ ыытылынна. Үс күннээх аһаҕас халлаан анныгар мас оҥоһуктары дьүүллүүр сүбэ сыаналаата. Дьүллүүр сүбэҕэ бэрэссэдээтэлинэн Мордовской Николай Моисеевич- СӨ норуотун маастара, мас ууһа; Чярин Федор Иванович -СӨ норуот маастара, мас ууһа, Тарабукин Эдуард Эдуардович- СӨ норуот уус-уран оҥоһуктарын маастара, хомусчут,Толстяков Георгий Афанасьевич – Алмаасэргиэнбаан Таатта улууһунааҕы салаатын специалиһа, Постникова Александра Николаевна -«Таатта» түмэл үлэһитэ, СӨ култууратын туйгуна үлэлээтилэр.
Ол курдук, 1 үрдэлгэ Тистяхов В.В. хамаандата саха классик сруйааччыта Н.Д.Неустроев «Балыксыт» кэпсээнинэн мас оҥоһуга муҥутуур кыайыылааҕынан буолла.
2 үрдэлгэ олоҥхоттон Дьураа хара аттаах Дьулуруйар Ньургун Боотуру оҥорон Попов В.Е. хамаандата таҕыста.
«Биэс ынахтаах Бэйбэрикээн эмээхсин» норуот остуоруйатынан чочуллан оҥоһуллубут Лопатин В.В. хамаандата 3 үрдэлгэ дабайда. Октислава Владиславовна Аргунова хамаандата “Микиитэ Лэглээрин уонна дьөһөгөй оҕото сааһы көрсүү” үлэлэрэ «Уран оҥоһук» уонна “Кыһыл көмүс муостаах таба» композициянан Варфоломеев В.В. хамаандата «Эгэлгэ дьэрэкээн оҥоһук» анал ааттарынан,спонсордар туруорбут сыаналаах бириистэринэнэн наҕараадаланнылар. Маны таһынан, мас уустук үлэтигэр хорсуннук ылсыбыт Октислава Владиславовна уонна Айкуо Аргуноваларга тимир ууһа Эдуард Тарабукин саха хомуһун бэлэх уунна уонна инники өттүгэр тимир уустарын күрэҕин тэрийэргэ этии киллэрдэ. «Таатта» түмэлин аатыттан өссө төгүл “Сыгынахтаах аартык» бырайыагы олоххо киллэрсибит, өйөөбүт уонна кыттыбыт дьоммутугар махталбытын тиэрдэбит. #сыгынахтаахаартык2021 #таатта #масуустара #масоҥоһук #конкурсдеревяннойскульптуры #wood #woodcarving #woodworking