Ырыаһыт уонна бэйиэт кэргэнниилэри Анна Ивановна Егорованы уонна Макар Иванович Кузьмины – Макар Хараны билиһиннэрэбит.
Кинилэр талба талааннарынан Таатта сириттэн силистээхтэр. Дьиктитэ, иккиэн биир нэһилиэктэн Уолбаттан төрүттээхтэр, биир сыл 1915 сыллаахха төрөөбүттэр, аҕаларын аата кытта биирэ. Кинилэри иккиэннэрин билэр дьон: “олус кыраһыабай паара этилэр”,- диэн ахтар.
Төрөппүттэрин тапталларын,олохторун туһунан кыыстара Земфира Макаровна Кузьмина суруйуутуттан билсиэҕиҥ:
“Аҕам сэрии иннинэ Дьокуускайдааҕы тыа хаһаайыстыбатын техникумугар үөрэммитэ. Онтон Москватааҕы журналистар Коммунистическай институттарын курсугар үөрэттэрэ ыыппыттара. Ити кэмҥэ ийэм -Анна Ивановна Воронежтааҕы музыкальнай училищеҕа үөрэнэ сылдьара. Биир дойдулаахтар ыраах тэлэһийэ сылдьаннар,билсэннэр,таптаһаннар ыал буолбуттара. Фашисткай Германия Сэбиэскэй Сойууска саба түһээри сылдьар тыйыс кэмэ этэ. Онон дьоллоох эдэр дьон арахсар күннэрэ ыган кэлбитэ. Аҕам Ийэ дойдутун хаанымсах халабырдьыттартан көмүскээри, Аҕа дойду сэриитин бастакы сылыттан сэриигэ аттаммыта. Ийэм дойдутугар кэлэн таптыыр идэтинэн үлэлээбитэ. Кэлин 1962 сыллаахха Чайковскай аатынан Москватааҕы консерваторияҕа биир сыллаах вокалистар идэлэрин үрдэтинэр курстарыгар олус ситиһиилээхтик үөрэнэн кэлбитэ. Аҕам Польшаҕа тиийэ сэриилэспитэ. Дойдутугар “За оборону Ленинграда” бойобуой медаллаах эргиллибитэ. Саамай дьиктитэ – 4 сылы быһа тиһигин быспакка сэрии уотун ортотугар өлөр-тиллэр ынырыктаах түгэннэргэ хоһоон айбыт-суруйбут этэ…”.
Ити курдук, эдэрдэр тапталлара уоттаах сэриини кыайан, түөрт уонча сыл кэриэтэ бииргэ буолан чаҕылхай олоҕу олорбуттара.
#тааттатүмэлэ
#музейтаатта
#museumtaatta
#lovestory
Тапталлаахтар күннэринэн
