Атырдьах ыйын быйаҥнаах күннэригэр маастар үрүҥ көмүстэн кыччыгый ньуосканы, алтантан уонна дьэс алтантан куомсуктары, атахтаах саахар иһитин айан таһаарбытын бэлэх уунна. Хас биирдии оҥоһугар маастар тус бэлиэтин киллэрбит.
Бу ойуу суолтатын Уйбаан уус маннык быһаарар:«Биирдэ сиэркилэ иннигэр туран, өйдөөн көрбүтүм сүүспэр дириҥ мыччыстаҕастардаах эбиппин, ол ойуутун кумааҕыга түһэрбитим. Саха итэҕэлигэр үс кут уруһуйугар майгынныырга дылы этэ, ол эрэн тэҥнэбил кэнниттэн уратылаһара тахсан кэлбитэ- икки ойоҕос лабааларын түһэр муннуктара уратылаһаллар эбит. Онон бу ойууну логотип оҥосторго ылыммытым”.
Уйбаан уус кэлиҥҥи сылларга үгүс улууска үлэҕинэн дьахтар толору симэҕин оҥордо. Маны сэргэ улахан оҥоһуктарын быыһыгар өрөспүүбүлүкэбит биллэр дьонун мэтириэттэрин тммиргэ быһан үйэтитэр, түмэллэр пуондаларын хаҥатар. Түмэлбит аатыттан Уйбаан ууска махтанабыт өрүү айа-тута , чэгиэн сылдьаргар.