Новости

Саха бастакы дьахтар суруйааччыта Анна Денисовна Неустроева кыайыы кынаттаах кинигэлэрэ

Бүгүн, Аан дойдутааҕы суруйааччылар күннэригэр, Тааттаттан үүнэн-сайдан тахсыбыт талааннаах суруйааччы Анна Денисовна Неустроева төрөөбүт күнэ бэлиэтэнэр. Биир дьиэ кэргэнтэн икки суруйааччы буолар дьылҕаламмыт убайдыы-балыс сэдэх көстүү буолар. Анна Денисовна убайа Николай Денисович саха литературатыгар комедия көрүҥүн төрүттээбит саха классик суруйааччыта буолар. Анна Денисовна оҕо аймахха «Тиргэһиттэр», «албын», «Оҕолор» о.д.а. айымнылары бэлэхтээбитэ.
«Таатта» түмэлигэр Анна Денисовна дьиэтээҕи коллекциятыттан үс кинигэ хараллар. Ол курдук, 1939сыллаахха поэт В.М.Новиков-Күннүк Уурастыырап латыынныы алпаабытынан таҥыллан тахсыбыт,»Ырыалар -хоһооннор, тылбаастар уонна поэмалар» кинигэтэ. Кинигэ бастакы сирэйин хаҥас муннугар : «А.Д.Неустроевой на добрую память» В.М.Новиков 4/V -39″ диэн чэрэниилэнэн суруллубут. Иккис кинигэ «Ийэ дойду иһин, Сталин иһин» уоттаах сэрии саҕаламмыт сылыгар 1941с. бэчээттэммит. Саха сирин поэттара Эллэй, Күннүк Уурастыырап, А.Бэрияк, олоҥхоһуттар М.Шараборин-Кумаарап, Н.А.Абрамов -Кынат о.д..а. кыайыы көтөллөөх айымньылара киирбиттэр.
Үһүс кинигэ, дойдуга эйэлээх олох эргийбитин кэннэ 1946с., төлөннөөх поэт Эллэй «Үөрүү» диэн хоһооннорун хомуурунньуга буолар. Кинигэлэр иккиэн инники сирэйдэригэр «Из книг А.Неустроевой» диэн бэлиэтээһиннээхтэр.
Саха бастакы дьахтар суруйааччыта Анна Денисовна Неустроева кинигэлэрин коллекциятын аймаҕа, РФ үтүөлээх бырааһа Земфира Макаровна Кузьмина 2000 сыллаахха туттарбыта.