Письмо ученице Т-Игидейской школы
Аргуновой Насте Гаврильевне.
Үтүө санаалаах, дьоллоох кыыс Настя!
Сылдьабын этэҥҥэ. Доруобайбын. Эhиги барыгыт үөрүүтүгэр уонна үрдүк дьолгутугар мин немецкэй талаанньыттары сылтан ордук времяҕа харса суох урусхаллаатым. Элбэх эрэйи көрдүм илбиhирбит сиэхситтэринэн сордоммут советскай дьоннор, дьахталлар, оҕолор харахтарын уутун, сордорун-муҥнарын, ыар олохторун уонна ынчыктарын көрдүм уонна иhиттим. Кулу, ……. уонна босхоломмут оҕо сирдэр үрдүк үөрүүнү, дьолу, соргуну көрүстүм.
Настя үтүө санааҥ иhин ис сүрэхпиттэн үөрэбин уонна махтанабын. Эн итии, оҕолуу санаалаах суруккун нууччалыы тылбаастаан часть командирыгар биэрдим, бэрткэ кэрэхсииллэр. Мин бэйэм чааспар киэҥник биллэбин, таптанабын. (ханна миигин таптаабатахтарай, ытыктаабатахтарай:).
Хаҥас түөспэр отечественнай сэрии орденын кыhыл көмүс уоттара умайаллар, «Кыhыл сулус» орден күлүмнүүр уота түөскэ иилинэр «Гвардия» значок – нуучча народун уонна кини Улуу полководецтарын албаннара, боевой традициялара, чиэстэрэ, хайҕаллара миэхэ суруктаах үрүҥ көмүс медаллаахпын.Бу килбиэннээх кыайыы иhин. Эhиги киэн туттаргытынан мин сүдүтүк үөрэбин уонна дойдубар эргийэр эрэлим төһө да өлүү хас минута аайы аргыстастар улахан. Настя үөрэххин кытаат, үөрэххэ баар киhи дьоло! Үөрэхтээх киhиэхэ суол киэн,ыраах чугас буолар дириҥ чычаас буолар, ордук нуучча тылын кичэй, кинини билии барыны быhаарар. Миигин аҕам эрэйдээх үөрэттэрэн киhи оҥорбута,кинІ санаалаабыта, олоҕу табатык сыаналыыр киhи оҥорбута, бар дьон таптыыр, ытыктыыр эйэҕэс санаалаах народ учуутала оҥорбута. Бу билигин мин олохпор, тиhэх мүччүргэннээх күннэрбэр, күүс көмө буолаллар бу народ киэн туттар улуу хайҕалын, үрдүк аатын сүгүөм суоҕа этэ! Куондарымаан туhунан сураҕы урут истибэт этим. Кинини умнубат этим. Үөрүү улахан улааттын. Александра Николаевнаҕа, эдьиийигэр уонна эhэн аахха привет, бары үтүөнү баҕарабыт. Эн суругун ыраах саха сириттэн Биhиги улуу Советскай дойдубутун туораан Карпаттар хайаларыгар, таптыыр учууталын боевой суолун сонордоон кэллэ. Дьэ ыраах айаны айаннаабытынан махтанабыт. Эн аҕан суруйбатыттан курутуйар этим, саатар Александра бооччойон көрбөт буоллаҕа дии саныырым.
1942с. сайын сайылаабатахпыттан курутуйбутум. Вася саҥаhыгар кэлиэ, оччо5о Васялыын бииргэ оонньооруҥ, үөрэххитигэр кыhаллаарыҥ. Кини быйыл ситэ үөрэммэтэх эhиил бэhис кылааска үөрэниэ. Дьэ, Настя улаат, үөрэххин кытаат, мин дойдубар эргийиибин айхаллыыр үөрүүлээх күнү кэтээ, кини чугас времяҕа буоларыгар үтүө баҕарыыта оҥор!
Хааллым үс орденнаах И.В.Кузьмин.
Полевая почта 894132
