Месяц: Июль 2022

Биир дойдулаахпыт, өрөспүүбүлүкэҕэ биллэр «Охотный двор» атыы-эргиэн ситимин салайааччыта, түмэлбит тэрээһиннэрин үбүлээччи Юрий Большаков  бырайыагынан төрөөбүт дойду уонна айылҕа ситимин туһунан  саҥа киинэтэ сүрэхтэннэ. Санатан эттэххэ, ыам ыйын 29 күнүттэн Таатта ытык сиригэр Юрий Большаков документальнай киинэтин биригээдэтэ үлэлээбитэ.  Саха сирин историятыгар Таатта бастакы үөрэхтээхтэрин, улуус историятын туһунан кыраайы үөрэтээччилэр Федора Михайловна Харитонова, Егор Ионович Ючюгяев уонна Владимир Таппыров о.д.а. кэпсээннэрэ киирдилэр.Дойду историятын уонна айылҕа ситимин туһунан киинэни ыйыллыбыт сигэнэн киирэн сэргээҥ 

«Ыллык» кыраайы үөрэтэр бырайыакпыт иитиллээччилэрэ Саха сиригэр ойуулуур-дьүһүннүүр искусствоны төрүттээбит, норуодунай худуоһунньук Иван Васильевич Попов утумун салҕааччыны Иван Иванович уонна кини кэргэнин Мария Семеновна Попованы кытта көрүстүлэр. Иван Иванович худуоһунньук эрэ буолбакка, өрөспүүбүлүкэҕэ биллэр скульптор, маны таһынан тарбахха баттанар реставраторынан биллэр. Худуоһунньук идэтигэр уһуйуллуутун, бастакы үлэлэрин, хартыыналарын историяларын туһунан оҕолор ыйытыыларыгар ирэ-хоро кэпсээтэ. Кэргэнэ Мария Ивановна эмиэ биллэр уруһуйдьут. Саха уонна хоту омук остуоруйаларын кинигэлэрин үгүс иллюстрациялаабыта. Билигин аныгы кэм ирдэбилинэн гаджеттарга уруһуйдуур дьарыгын туһунан билиһиннэрдэ. Икки талааннаах дьон уруһуйдарын илиилэриттэн араарбакка кэнчээри ыччакка билиини-идэни иҥэрэн, иккиэн преподователлыыллар. Иван Иванович АГИКИ-га, Мария Семеновна ХИФУ быыстапкалыыр саалатыгар айар-тутар дьарыктары (мастер-класстары) ситиһиилээхтик ыытар.