Опубликовано

Таптыаҕыҥ ийэни

 Күн көрүө – от үүнүө,
Сибэкки тэтэриэ,
Күнэ суох туох үүнүөй –
Күөх сирэм күкээриэ.
Ол тэҥэ – Күн тэҥэ
Эн ийэҥ, мин ийэм.
Ийэтэ суох иинэн
Иһийиэ сир ийэ.

Күндүттэн күндүнү,
Кэрэттэн кэрэни,
Күөх сирэм сир күнүн
Таптыаҕыҥ ийэни!

     Бүгүн сэтинньи 29 күнүгэр саха норуодунай суруйааччыта Серафим Романович Кулачиков-Эллэй төрөөбүт күнэ. Эллэй тылларыгар айыллыбыт уостан түспэт ырыаны эдэриттэн эмэнигэр таптаан ыллыыбыт.  Сахабыт сирин ийэлэрин сылынан  чуопчаарар чуораанчыктарбыт, кэнчээри ыччаттарбыт күн күбэй ийэлэригэр эҕэрдэ хоһооннорун аныыллар, биллиилээх суруйааччылар айымньыларын уус-ураннык ааҕалларын сэргээҥ#Ийэсыла #Годматери #Эллэй

 

И.Н.Гуляев аатынан Туора Күөл орто оскуолатын 4 кылааһын үөрэнээччитэ Захаров Давид Эллэй “Таптыаҕыҥ ийэни” хоһооно
Харбалаахтааҕы үөрэхтээһин холбоһугун оскуолатын 7 кылааһын үөрэнээччитэ Алексеева Туйаара Мария Валерьевнаҕа хоһоонун аныыр
Уолба орто оскуолатын 7 кылааһын үөрэнээччитэ Капитонов Гоша толоруутугар В.Алексеев “Ийэ” хоһооно.
Уолба орто оскуолатын 5 кылааһын үөрэнээччитэ Таппырова Алена Иван Федосеев “Ийэ” хоһооно.
Уолба орто оскуолатын 6 кылааһын үөрэнээччитэ Федотова Лена В.Алексеев “Саха эмээхсинигэр” хоһооно
И.Н.Гуляев аатынан Туора Күөл орто оскуолатын 6 кылааһын үөрэнээччитэ Алексеев Павлик Семен Данилов “Ийэбэр” хоһооно
И.Н.Гуляев аатынан Туора Күөл орто оскуолатын 6 кылааһын үөрэнээччитэ Пахомов Валера Степан Тимофеев хоһооно
И.Н.Гуляев аатынан Туора Күөл орто оскуолатын 4 кылааһын үөрэнээччитэ Макаров Эрчим Баал Хабырыыс “Ийэ” хоһооно
Орто Халыма улууһун Г.Софронов аатынан Өлөөкө күөл орто оскуолатын 8 кылааһын үөрэнээччитэ Винокурова Жанна Эллэй “Таптыаҕыҥ ийэни”
Опубликовано

Любовь Борисова “Кэрэни көрбүт” драмата “Зимний” киинэ фестивалыгар кыттыаҕа

         Режиссер Любовь Борисова “Не хороните меня без Ивана” (Кэрэни көрбүт) уус-уран киинэтэ  бу дьыл ахсынньы 2-8 күннэригэр Москва куоракка  “Зимний” киинэ фестивалыгар көстүөҕэ. 

           Саха сиригэр ойуулуур-дьүһүннүүр искусствоны төрүттээбит,  норуодунай худуоһунньук Иван Васильевич Попов уонна кини истиҥ доҕоро Ыстапаан туһунан киинэни саха дьоно бары кэтэһэр буолуохтаахтар.  Киинэ режиссера Любовь Пантелеймоновна Борисова дойду киинэтин индустриятыгар аата киэҥник биллэр. Ол курдук, 2018 сыллаахха күөх экраҥҥа  «Надо мною солнце не садится» киинэтин сүрэхтээн, аан дойдутааҕы таһымнаах киинэ фестивалларыгар ситиһиилээхтик кыттыбыта.

       Саҥа киинэ уһуллуута 2021 сыллаахтан худуоһунньук төрөөбүт Тааттатыттан саҕаламмыта. Сайын устата “Таатта” түмэлин Хадаайы кырдалыгар 50-тан тахса киинэ уһулааччы, өрөспүүбүлүкэ театрдарын биллиилээх артыыстара үлэлээбиттэрэ. Сүрүн оруолларга литовец Дариус Гумаускас Иван Васильевич, Нөмүгү театрын артыыһа Александр Чыычаахап  Ыстапаан оруолларын толорбуттара. 

       Аан бастакынан киинэни Москва куорат олохтоохторо уонна ыалдьыттара көрөр чиэскэ тигистилэр. Ол курдук,  “Зимний” авторскай киинэ фестивала бу дьыл ахсынньы 2-8 күннэригэр ыытыллара былааннанар. Фестивал ирдэбилинэн күрэххэ  болдьоммут күҥҥэ диэри хамыыһыйаны ааспыт, эрдэ ханна да көрдөрүллүбэтэх,  чаастан ордуктаах    10-12  үлэни  күрэххэ киллэриэхтэрэ.  Дьүүллүүр сүбэ быһаарыытынан бастыҥнары талыахтара. 

        Оттон биһиги айар-тутар талааннаах “Саха фильм” хапмаанньаҕа уонна Любовь Борисоваҕа махталбытын тиэрдэбит уонна ситиһиини баҕарабыт! Саҥа ааттар, саҥа саҕахтар арыллан истиннэр.